Provincia di Sassari | Pari Opportunità

Aree Tematiche

Pari Opportunità

Sa Provìntzia de Thàthari, dae semper atenta a su tema de sas paridade intre òmine e fèmina, at istituidu un'àrea dedicada a s'àmbitu de sas polìticas de ugualàntzia, signale de un'investimentu forte e significativu a livellu siat operativu siat simbòlicu.

S'aplicatzione de su printzìpiu de sa paridade de oportunidades intre òmines e fèminas est intre sos obietivos prioritàrios in s'àmbitu de sas polìticas de s'amministratzione nostra. Sa Provìntzia de Thàthari adotat su printzìpiu de s'eliminatzione de sas disugualàntzias e de sa promotzione de sa paridade de gènere, ischende chi, pro nche bogare sas disparidades chi galu esistent, tocat a agiuare sas fèminas in sos ruolos meda chi tenent in su cuntestu sotziale, familiare e de traballu.

Custa àrea dedicada a sa paridade de oportunidades permitet de atzèdere a totu sas informatziones riferidas a sas polìticas de gènere, a sa retza de servìtzios ativos cun riferimentu particulare a sos temas de su traballu pro s'ocupabilidade e s'imprenditorialidade feminile e a sas atividades promòvidas dae sa Provìntzia.

Pro custu iscopu òperant duas figuras professionales diferentes, sa Cussigera de paridade (istituida cun sa Lege n.125 de su 10 de abrile de su 1991) e sa Cummissione Provintziale pro sa paridade de oportunidades chi promovent cun modalidades diferentes sa paridade de oportunidades: sa prima, cun s'atuatzione de interventos pro nche bogare impèigos e discriminatziones diretas e indiretas contra a sas fèminas mescamente in su traballu, sa segunda difundende sa cultura de sa paridade de oportunidades intre òmines e fèminas pro valorizare sa diferèntzia de gènere, feminile e maschile, comente fatore de isvilupu e progressu.

Paridade de oportunidades comente “cunditzione de matessi possibilidade de resèssida o de matessi ocasiones favorèvoles”, cheret nàrrere a reconnòschere a totu sas pessones, òmines e fèminas, paridade de dignidade e de deretos, e a realizare su passàgiu inevitàbile intre paridade formale e ugualàntzia sustantziale. Unu logu de comunicatzione, pràticu che a cuddu virtuale de su situ istitutzionale de sa Provìntzia, chi funtzionet comente comunidade de iscàmbiu, informatzione, servìtziu, promotzione e cooperatzione intre isitutziones e sotziedade tzivile, cumintzende dae cudda feminile, contribuit a crèschere su protagonismu e sa sugetividade feminile in ogni àmbitu sotziale.